سوشيالجي النهارده حيتكلم عن الأجازة بما أن موسم الأعياد على الأبواب وفي ناس بترتب تسافروأٍسعار الفنادق غاليه وعايزين يوفروا أقصى درجه ممكنه
الحل وعن تجربة في تطبيق Airbnb لحجز الشقق والمنازل او الغرف المستقلة او المشتركة.
التطبيق عالمي ومضمون للناس الي اول مره حتجربه وجربته قبل كده في فرنسا وروسيا وتركيا في حجز شقق او غرف
الميزة في التطبيق ده أنه بيوفرلك سكن في اماكن غير تقليديه ومش موجود فيها فنادق يعني ممكن تاجر منه كوخ في غابه او منزل فوق قمة جبل او بيت في الريف في مكان خلاب
نبدأ بالخطوات مع سوشيالجي
سوشيالجي في أجازة
مجرد ما تسجل في البرنامج وتبدا تخطط لرحلتك اول حاجه تعملها تدخل اسم المكان الي عايز تروحه في خانة البحث ومثلا حنكتب هنا turkey حيطلع لك خيارات كتير حتختار منها homes
بعدها حيكون قدامك اكتر من فلتر علشان تصفي نتايج البحث
أول فلتر التاريخ Dates وده مهم جدا علشان يطلع لك البيوت او الغرف الي مش محجوزه والمتاحة في الوقت المحدد لوصولك
ثانيا الـ Gustes بتحدد عد الاشخاص علشان تدور على سكن يناسبكم كعائلة مثلا ( وهنا مش بتتحاسب زي الفندق مثلا على الفرد لا انت بتحاسب على الليلة في المكان على حسب سعته المعروضه ايا كان عددكم يعني مثلا منزل بيشيل ٨ افراد بـ ٥٠ دولار في الليلة فانت بتحاسب على الليلة مش عدد الافراد)
ثالثا الـ Home type وده فيه ثلاث خيارات Entire place والخيار ده لو اختارته حيطلعلك فقط البيوت والفلل الكاملة ده لو معاك العائله او لو عايز تاخد مكان كامل لواحدك ولو مش عايز مكان كامل بتغير الخيار ده الى Private room او لو عايز غرفه مشتركه بتختار Shared room
رابعا الـ Price وده بتختار فيه متوسط السعر في لليلة حسب ميزانيتك حد ادنى وحد أقصى وبتتصفى نتايج البحث وبتطلع كل الي اسعارها في الرينج ده
خامسا الـ Instant Book وده خيار الحجز الفوري يعني بيطلعك البيوت او الشقق والغرف الي تقدر تحجزها بدون انتظار رد صاحبهم وده في حالة انك مستعجل
هو خيار لا انصح به عن تجربة في رحلة روسيا حجزنا شقه ووصلنا المدينة وكان صاحب الشقه ماخدش باله من الحجز وتاخرنا ساعتين في استلام الشقه وكان فيها كماليات ناقصه كملها واحنا موجودين فلو مش مستعجل الغي تفعيل الخيار ده وانت بتدور
ولما تيجي تحجز بيطلعلك بدل خيار Book خيار Requst Book وده بيخليك تبعت رساله لصاحب البيت تقوله انك عايز تحجز البيت وتديله تفاصيل بسيطه عنك والمفروض يرد خلال يوم
سادسا الـ Trip type وده جواه في نوعين اولهم For families والثاني For work trips وعلى حسب نوع رحلتك اختار هو مفيش فرق كبير اوي بين الخيارين بس لو اختارت لرحلات العمل مثلا بيطلعك في نتائج البحث البيوت الي فيها مكاتب مثلا او مساحات مجهزه للعمل وفيها انترنت ومجهزة
في خيارات اخرى برضو زي Beds و Bedrooms و Bathrooms بتختار منهم عدد السراير وعدد غرف النوم وعدد الحمامات وبيصفي نتايج البحث وفق الخيارات الي انت طالبها
بعد ما طلعلك نتايج البحث وفق الخيارات الي فوق دي نصايح سوشيالجي لحجز آمن :
١- تقرا الرفيو والتقييم الي كاتبه الي استخدموا المنزل قبل كده وده حيساعدك كتير انك تحجز او متحجزش يعني مثلا ممكن تلاقي التقييم سيء لان البيت مش هو الي في الصورة او ان المكان بعيد عن المواصلات او الخدمات او كان مكتوب ان فيه ميزه وطلعت مش موجوده وهكذا التقييم بيكون موجود تحت خصائص المنزل والمميزات الي فيه
سوشيالجي في أجازة
٢- تشوف ايه المميزات الي في البيت او الغرفه دي يعني فيها غساله او مكواه او انترنت هل في مطبخ؟ هل في مصعد مثلا لو في دور عالي وهكذا
٣- تشوف اللوكيشن وهو بيكون موضح في اخر الصفحه تحت وحاول تزوم على المكان وتستكشف المنطقه المحيطه بيه هو معتمد على خرائط جوجل فحيظهر لك لو في محلات او مستشفيات او مولات او اي خدمات فى المنطقة وكذلك طرق المواصلات الرئيسيه وعل اساس الموقع بتحسم أمرك تحجز او لا
٤- لو عجبك منزل او غرفه ومش عايز تحجزه الان حتلاقي علامه قلب عليه دوس عليها وحيتضاف المنزل في المفضله سهل ترجعه في اي وقت تتم عملية الحجز
٥- مهم جدا تقرا الـ Policies و الـ House Rules لانه بيترتب عليه حاجات كتير جدا يعني ممكن تلاقي انه غير مسموح بالتدخين وانت بتدخن او انه غير مسموح بالحيوانات وانت واخد الكلب او القطه معك وهكذا
آخيرا الدفع والحجز
بعدما بتشوف كل ده وتحسم أمرك على منزل بتحجزه وبتدفع من خلال الفيزا حاول تقرا قبل الحجز سياسة الاسترجاع لو حبيت تلغي الحجز اي هيا المده الزمنية الي تقدر تسترجع فيها كل المبلغ وايه هيا المده الي لو كنسلت فيها الحجز اخسر الي دفعته
واليوم يقدم لكم سوشيالجي عرض
ممكن تسجل في الموقع من خلال الرابط الي تحت وحتكسب خصم قيمته ١٣٠ ليرة تركية في حالة اذا كانت قيمه حجزك أكبر من ٢٥٠ ليرة
